@News Entry# 134891
બ્લૅક ફ્રાયડે - દીવા-કલ્યાણ વચ્ચે ખોટકાઈ આઠ લોકલ ટ્રેન!
લાખો પ્રવાસીઓ થયા પરેશાન: પાંચ કલાક સુધી ઠપ રહ્યો ટ્રેનવ્યવહાર, મેજર મુશ્કેલી છતાંય મેલ-એક્સપ્રેસને હૉલ્ટ આપવાનું મ. રે.ને સૂઝયું નહીં
(અમારા પ્રતિનિધિ તરફથી)
મુંબઈ: મધ્ય રેલવેના પ્રવાસીઓ માટે શુક્રવાર ખરેખર ‘બ્લૅક ફ્રાયડે’ સાબિત થયો હતો. પેન્ટોગ્રાફ તૂટી પડતા દીવા-કલ્યાણ વચ્ચે કુલ આઠ-આઠ લોકલ ટ્રેન ખોટકાઈ ગઈ હતી. આને કારણે મધ્ય રેલવેનો ટ્રેનવ્યવહાર સતત પાંચ કલાક સુધી ઠપ રહ્યો હતો. આ સમસ્યાને કારણે મ. રે.ના લાખો પ્રવાસીઓએ પારાવાર હાલાકી વેઠવી પડી હતી.
મધ્ય રેલવેના ડિવિઝનલ રેલવે મેનેજર મૂકેશ નિગમે ‘મુંબઈ સમાચાર’ને જણાવ્યું હતું કે ‘સવારે ૮.૦૫ વાગ્યે પહેલી લોકલ ટ્રેનનો પેન્ટોગ્રાફ કલ્યાણ-વિઠ્ઠલવાડી...
Read more...

વચ્ચે તૂટ્યો હતો. ત્યારબાદ તો ત્રણ કલાકમાં દીવા-કલ્યાણ વચ્ચે કુલ આઠ ડાઉન-ફાસ્ટ લોકલના પેન્ટોગ્રાફ તૂટ્યા હોવાનું જણાયું હતું.’ ડાઉન લોકલ ટ્રેનો ખોટકાતા કલ્યાણ-કર્જત સેક્શનનો અપ ટ્રેનવ્યવહાર પણ સાવ ખોટકાઈ ગયો હતો. પાંચ કલાક દરમિયાન કલ્યાણ-કર્જત વચ્ચેની લગભગ ૫૦ લોકલ ટ્રેન રદ થઈ હતી.
‘હું ૧૧.૦૦ વાગ્યાથી ઉલ્હાસનગર સ્ટેશને ઊભી હતી, પરંતુ અઢી કલાકના ઈંતેજાર બાદ પણ એક પણ લોકલ ટ્રેન આવી નહોતી. છેવટે મારે રિક્ષા દ્વારા કલ્યાણ સુધી જવું પડ્યું હતું, ’ એવું ઉલ્હાસનગરવાસી રેશ્મા કાળેએ જણાવ્યું હતું. ‘રેલવે દ્વારા પરિસ્થિતિની સાચી જાણ કરતી અનાઉન્સમેન્ટ પણ કરવામાં નહોતી આવી. સામાન્ય રીતે મેગા બ્લૉક, સ્પેશિયલ ટ્રેનના મેસેજ કરતી રેલવેએ આવી સ્થિતિમાં પ્રવાસીઓને મદદરૂપ થાય અને હકીકતની જાણકારી મળે એવા મેસેજ મોકલવા જોઈએ, ’ એવો રોષ કોલેજિયન વૈભવ શાહે વ્યક્ત કર્યો હતો.
સવારે ૮.૦૫ વાગ્યાથી ખોટકાયેલો ટ્રેનવ્યવહાર છેક ૧.૩૦ વાગ્યે શરૂ થયો હતો. પરિણામે બપોરની ટ્રેનોમાં પગ મૂકવાની પણ જગ્યા મળી નહોતી. તમામ રેલવે સ્ટેશનો પર ઈન્ડિકેટરમાં ‘૦૦.૦૦’નો સમય દેખાતો હતો, પણ ટ્રેનો દોડતી જોવા મળી ન હતી. કલ્યાણ-થાણે વચ્ચે ફાસ્ટ ટ્રેકને બદલે મેલ-એક્સપ્રેસ અને તમામ ટ્રેનો સ્લૉ ટ્રેક પર દોડાવવામાં આવતા થાણે સુધી ટ્રેક પર ટ્રેનોની કતાર પણ જોવા મળી હતી. બપોરે ટ્રેનવ્યવહાર શરૂ થઈ ગયો હતો, પરંતુ સાંજના ધસારાના સમયે પણ અનેક ટ્રેનો રદ થતા ફરી પ્રવાસીઓને હાડમારી વેઠવી પડી હતી.
મધ્ય રેલવેમાં થાણે-કર્જત વચ્ચે મેજર ટેક્નિકલ સમસ્યા સર્જાઈ હોવા છતાંય લાખો પ્રવાસીઓની સુવિધા માટે મેલ-એક્સપ્રેસ ટ્રેનોને કર્જત-કલ્યાણ વચ્ચે હૉલ્ટ આપવાનું મ. રે.ના અધિકારીઓએ જરૂરી સમજ્યું નહોતું. હૈદરાબાદ-મુંબઈ એક્સપ્રેસને કર્જત-કલ્યાણ સુધી તમામ સ્ટેશને હૉલ્ટ તો આપવામાં આવ્યું હતું, પરંતુ અંબરનાથ સ્ટેશને તેના પાંચ-છ કોચ પ્લેટફોર્મની બહાર ગયા બાદ ટ્રેન ઊભી રાખવામાં આવી હતી. વધુમાં ગરમીને ધ્યાનમાં રાખતા પ્રવાસીઓની સુવિધા માટે એસી કોચ પ્લેટફોર્મ પર આવે એ રીતે આ ટ્રેન અંબરનાથ સ્ટેશને ઊભી રાખવામાં આવી હતી, પરંતુ ખાટલે મોટી ખોડ એ હતી કે એસી કોચના દરવાજા જ અંદરથી બંધ હતા. આમ માત્ર એક જ ટ્રેન ઊભી રાખવામાં આવી હતી, પરંતુ એ પણ પ્રવાસીઓ માટે સહાયકારી બનવાને બદલે અગવડદાયી સાબિત થયું હતું. ત્યારબાદની એક પણ મેલ-એક્સપ્રેસને વચ્ચેના સ્ટેશનો પર હૉલ્ટ નહોતા આપવામાં આવ્યા. આ બાબતે મધ્ય રેલવેના અધિકારીઓને ફરિયાદ કરતા તેમણે મગનું નામ મરી પાડ્યું નહોતું.
ટાઈમ લાઈન
વહેલી સવારે ૪.૦૦ વાગ્યે: પાર્સિક ટનલનો બ્લૉક પૂરો થયો
સવારે ૮.૦૫ વાગ્યે: કલ્યાણ-વિઠ્ઠલવાડી વચ્ચે પહેલી લોકલનો પેન્ટોગ્રાફ ખોટકાયો
સવારે ૮.૨૦ વાગ્યે: કસારા લોકલનો પેન્ટોગ્રાફ કલ્યાણ સ્ટેશને ખોટકાયો
સવારે ૧૧.૦૦ વાગ્યે: કુલ આઠ લોકલના પેન્ટોગ્રાફ ખોટકાયા
બપોરે ૧૨.૦૦ વાગ્યે: પેન્ટોગ્રાફ ખોટકાવાનું કારણ ખબર પડી
બપોરે ૧.૩૦ વાગ્યે: પાર્સિક ટનલમાં ઓવરહેડ વાયરનું સમારકામ કરાયું.