मुंबई
मेट्रोच्या स्टेशनच्या जिन्यांच्या कामामुळे वर्सोवा ते घाटकोपर या मार्गात काही ठिकाणी पर्जन्य जलवाहिन्यांचे झालेले नुकसान , रस्त्यावर पडलेले डेब्रिज , बांधकाम सुरू असलेल्या ठिकाणी बॅरिकेडिंगची आवश्यकता अशा अनेक गोष्टी महापालिका आयुक्त सीताराम कुंटे आणि महानगर आयुक्त राहुल अस्थाना यांच्या संयुक्त पाहणी दौऱ्यात समोर आल्या.
पावसाळ्यात येणाऱ्या अडचणी लक्षात घेऊन त्यावर मात करण्यासाठी सकाळी सात वाजल्यापासून ११ वाजेपर्यंत दोन्ही आयुक्तांनी वर्सोवा ते घाटकोपर असा मेट्रो मार्गाचा दौरा केला. वर्सोवा-अंधेरी-घाटकोपर या पहिल्या मेट्रोचे बहुतांश बांधकाम पूर्ण झाले आहे. अंधेरी स्टेशन , असल्फा , घाटकोपर-सर्वोदय येथे अजूनही काम बाकी आहे. उर्वरित ठिकाणी रूळ घालणे , वीजपुरवठ्याची व्यवस्था आदींचे काम सुरू आहे. स्टेशनांवर ये-जा करण्यासाठी रस्त्याच्या कडेला फूटपाथवर जिन्यांचे बांधकामही वेगाने सुरू आहे. या बांधकामादरम्यान पर्जन्य जलवाहिन्यांचे काही ठिकाणी नुकसान झाल्याचे महानगर आयुक्त राहुल अस्थाना यांनी सांगितले. तसेच एकूण कामाच्या टप्प्यात बऱ्याच ठिकाणी डेब्रिजही पडल्याचे...
Read more...

लक्षात आले. या दोन्ही गोष्टींची तातडीने दखल घेण्याची सूचना मुंबई मेट्रो वन कंपनीस करण्यात आली आहे. तसेच सध्या जिथे बांधकाम सुरू आहे , त्या संपूर्ण भागास बॅरिकेडिंग करण्याच्याही सूचना करण्यात आल्या आहेत.
मेट्रोच्या कामामुळे पावसाळ्यात मुंबईकरांना कोणताही त्रास होणार नाही , याची दक्षता एमएमआरडीए आणि मुंबई मेट्रो वन कंपनी घेतील , अशी अपेक्षा या पाहणीनंतर सीताराम कुंटे यांनी व्यक्त केली. दरम्यान , ५ जून रोजी दोन्ही आयुक्त मोनो रेल्वेच्या मार्गावर सुरू असलेल्या बांधकामांची पाहणी करणार आहेत. २४ तास नियंत्रण कक्ष
एमएमआरडीएमार्फत मुंबईच्या निरनिराळ्या भागात मेट्रो , मोनो , जोड रस्ते , ईस्टर्न फ्रीवे आदींची कामे सुरू आहेत. पावसाळ्यात यापैकी कोणत्याही ठिकाणी काही अडचण उद्भवल्यास मुंबईकरांना तातडीने संपर्क साधता यावा म्हणून एमएमआरडीएने शुक्रवारपासून २५ तास सुरू राहणारा नियंत्रण कक्ष कार्यान्वित केला आहे. या कक्षासाठी निरनिराळ्या प्रकल्पांसाठी पाच समन्वयक अधिकारी आणि ३५ कर्मचारी असा ताफा तीन पाळ्यांमध्ये काम करणार आहे. रेल्वे , महापालिका , वाहतूक पोलिस , बेस्ट , अग्निशमन दल आणि इतर संस्थांशीही हा नियंत्रण कक्ष संपर्कात राहील , असे सहप्रकल्प संचालक दिलीप कवठकर यांनी सांगितले. नियंत्रण कक्षाचे क्रमांक ः २६५९१२४१ , २६५९४१७६ , ८०८०७०५०५१.