म. टा. खास प्रतिनिधी, मुंबई
कोकण रेल्वेच्या डबलडेकर एसी एक्स्प्रेस प्रत्यक्षात येण्याचा मार्ग मोकळा झाला आहे. सीएसटी ते मडगावपर्यंत धावणाऱ्या एसी एक्स्प्रेसची चाचणी शनिवारी रोह्यापर्यंत पार पडली. या एक्स्प्रेसच्या आणखी काही चाचण्या होणार असून, त्यांच्या सुरक्षाविषयक अंतिम अहवाल आठवड्याभरात आल्यानंतर ही सेवा प्रत्यक्ष सेवेत आणण्याचा निर्णय घेण्यात येणार आहे.
'कोरे'च्या सीएसटी ते मडगावपर्यंत जाणाऱ्या डबलडेकर एसी एक्स्प्रेसचे दहा डबे गेल्या आठवड्यात मुंबईत दाखल झाले. लोकमान्य टिळक टर्मिनस (एलटीटी) येथे या डब्यांची देखरेख केली जात आहे. या एक्स्प्रेसची प्रत्यक्ष चाचणी मडगावपर्यंत संपूर्ण मार्गावर वेगवेगळ्या अधिकाऱ्यांच्या देखरेखीखाली पार पडणार आहे. मध्य रेलवेच्या अखत्यारित रोहा आणि...
more... त्यापुढे कोकण रेल्वेच्या अधिकाऱ्यांच्या उपस्थितीत संपूर्ण चाचण्या पार पडणार आहेत. त्यापैकी पहिल्या चाचणीचा मुहूर्त शनिवारी साधण्यात आला.
त्यानंतर पुढील आठवड्यापर्यंत आणखी काही चाचण्या घेण्यात येणार आहे. या चाचण्यांसाठी रेल्वेच्या 'रिसर्च डिझाइन अँड स्टँडर्ड ऑर्गनायझेशन' (आरडीएसओ) विभागातील ज्येष्ठ अधिकारी आणि तज्ज्ञांचे पथकही आले आहेत. त्यानंतर मुख्य सुरक्षा आयुक्तांकडूनही (सीआरएस) या मार्गाचे परीक्षण केले जाणार आहे. या साऱ्या चाचण्यांचे अहवाल आठवड्याभरात येण्याची अपेक्षा आहे. त्यानंतर ही सेवा सुरू करण्याचा अंतिम निर्णय घेतला जाणार असल्याची माहिती मध्य रेल्वेचे विभागीय रेल्वे आयुक्त मुकेश निगम यांनी दिली.
वेगावरील नियंत्रण काढले
दिवा-सावंतवाडी पॅसेंजर अपघातानंतर रोह्यापर्यंतच्या मार्गावरील मेल/एक्स्प्रेसच्या वेगावर तात्पुरते निर्बंध काढण्यात आले होते. ते निर्बंध बाजूला ठेवल्यानंतर चाचणी घेण्यात आल्याची माहिती मध्य रेल्वेच्या वरिष्ठ अधिकाऱ्यांनी दिली. दिवा-सावंतवाडी पॅसेंजरला झालेल्या अपघातानंतर मध्य रेल्वेवरील रोह्यापर्यंत मेल/एक्स्प्रेसची वेगमर्यादा कमी करण्यात आली होती. सुरक्षेसंदर्भात ही उपाययोजना आखल्याने चाचण्यांचे वेळापत्रक लांबणीवर पडले होते.
चाचणीचे लक्ष्य
साधारणपणे बोगदे, वळणावळणाचे रूळ अशा ठिकाणी वेगमर्यादा आणि सुरक्षेच्या दृष्टीने ही चाचणी घेतली जाणार आहे. रोह्यापुढे कोकण रेल्वेच्या अधिकाऱ्यांच्या उपस्थितीत त्या मार्गावरील चाचण्या होतील, असेही स्पष्ट करण्यात आले आहे. चाचण्यांमध्ये डब्यांचे वजन जोखण्यासाठी दगडमातीने भरलेल्या गोण्या ठेवण्यात येतात. त्यामुळे गाडीचे वजन, क्षमता, वेग, रुळांची क्षमता तपासणे शक्य होते.