കൊല്ലങ്കോട് ∙ മധുരയിലേക്കു നീട്ടിയ അമൃത എക്സ്പ്രസിനു കൊല്ലങ്കോട്ട് സ്റ്റോപ്പ് അനുവദിക്കണമെന്ന് ആവശ്യപ്പെട്ടുള്ള ജനകീയ പ്രതിഷേധങ്ങൾ ശക്തമാവുന്നു. ജനപ്രതിനിധികളുടെ ഭാഗത്തു നിന്നും ശക്തമായ ഇടപെടലുകൾ ഉണ്ടായില്ലെന്നും പരാതികൾ ശക്തമാണ്. അമൃതയ്ക്കു സ്റ്റോപ്പ് അനുവദിക്കാൻ സംസ്ഥാന സർക്കാർ ഇടപെടണമെന്നാവശ്യപ്പെട്ടു കൊല്ലങ്കോട് ടിഎഎൽപി സ്കൂളിലെ കുട്ടികൾ മുഖ്യമന്ത്രിക്കു പോസ്റ്റ് കാർഡിൽ കത്തയച്ചു.
പ്രധാന അധ്യാപിക ഷെറീഫ, അധ്യാപകരായ അനീഷ്, മുസ്തഫ, സി.കെ.ബിന്ദു, സ്കൂൾ ലീഡർ കെ.അഷ്ന, ശ്രീഹരി എന്നിവരുടെ നേതൃത്വത്തിൽ തയാറാക്കിയ കത്തുകളാണ് മുഖ്യമന്ത്രിക്കു അയച്ചത്. കഴിഞ്ഞ ദിവസം സോൾ ഫൗണ്ടേഷൻ ഒപ്പു ശേഖരണത്തിനു തുടക്കം കുറിച്ചിരുന്നു. സമീപ പഞ്ചായത്തുകളിലും ഒപ്പ് ശേഖരണം നടത്തി റെയിൽവേ ഡിവിഷനൽ മാനേജർക്കു സമർപ്പിക്കുകയാണു സംഘടനയുടെ ലക്ഷ്യം.
റെയിൽവേ അവഗണനയ്ക്കെതിരെ പ്രതിഷേധ കൂട്ടായ്മ ഇന്ന്
പാലക്കാട്–പൊള്ളാച്ചി...
more...

ലൈനിനോടുള്ള റെയിൽവേ അവഗണനയ്ക്കെതിരെ പ്രതിഷേധ കൂട്ടായ്മ ഇന്നു വൈകിട്ട് അഞ്ചിനു മുതലമട കാമ്പ്രത്ത്ചള്ളയിൽ നടക്കും. ദക്ഷിണേന്ത്യൻ ക്ഷേത്ര നഗരങ്ങളെ ബന്ധിപ്പിക്കുന്ന പ്രധാന റെയിൽപാതയാണിത്. ചികിൽസാ ആവശ്യങ്ങൾക്കായി എറണാകുളം, തിരുവനന്തപുരം, ചെന്നൈ എന്നിവിടങ്ങളിലേക്ക് എത്തിച്ചേരാൻ ഇൗ പാത പ്രയോജനപ്പെടുത്താം.
ഒരു വർഷം ഏകദേശം എഴുപതിനായിരം ടൺ മാങ്ങ കയറ്റുമതി ചെയ്യുന്ന പ്രധാന വ്യാവസായിക ഇടനാഴി കൂടിയാണ് ഇൗ റെയിൽപാത. എന്നാൽ ഇതൊന്നും പരിഗണിക്കാതെ മധുരയിലേക്കു ദീർഘിപ്പിച്ച അമൃത എക്സ്പ്രസിനും പാലക്കാട്ടേക്കു നീട്ടിയ ചെന്നൈ–പഴനി എക്സ്പ്രസിനും സ്റ്റോപ്പുകൾ അനുവദിക്കുന്നില്ല.
മുതലമടയിൽ നിന്നും പാഴ്സൽ സർവീസ് ആരംഭിക്കണമെന്ന ആവശ്യവും അവഗണിക്കപ്പെടുന്നുവെന്നാരോപിച്ചു നടത്തുന്ന പ്രതിഷേധ കൂട്ടായ്മ കെ.ബാബു എംഎൽഎ ഉദ്ഘാടനം ചെയ്യും. പഞ്ചായത്ത് പ്രസിഡന്റ് കെ.ബേബിസുധ അധ്യക്ഷയാവും. വിവിധ രാഷ്ട്രീയ സാമൂഹിക സംഘടന പ്രതിനിധികളും ജനപ്രതിനിധികളും കൂട്ടായ്മയിൽ പങ്കെടുക്കും.
കൊല്ലങ്കോട്ട് അമൃത എക്സ്പ്രസിനു സ്റ്റോപ്പ് വേണമെന്നു കൊല്ലങ്കോട് മർച്ചന്റ്സ് സഹകരണ സൊസൈറ്റി ഭരണസമിതി യോഗം ആവശ്യപ്പെട്ടു. പൊള്ളാച്ചി–ഉദുമൽപേട്ട–ഡിണ്ടിഗൽ എന്നിവിടങ്ങളിലേക്കു വ്യാപാര ആവശ്യത്തിനു പോവുന്നവർക്കു ഏറെ പ്രയോജനപ്പെടുന്നതാണ് അമൃത എക്സ്പ്രസ്.
സ്റ്റോപ്പ് അനുവദിക്കാത്ത റെയിൽവേ നിലപാട് പ്രതിഷേധാർഹമാണ്. പ്രസിഡന്റ് കെ.സത്യപാൽ അധ്യക്ഷനായി. എം.ശശീന്ദ്രൻ, ടി.ഒ.ഭാസ്ക്കർ, ഉണ്ണിക്കൃഷ്ണപിള്ള, അനന്തകൃഷ്ണൻ, സുന്ദരൻ, കെ.പി.രാഘവൻ, സി.രാധാക‌ൃഷ്ണൻ, വൽസലകുമാരി, മല്ലിക, പ്രസന്ന എന്നിവർ പ്രസംഗിച്ചു.